هونةرمةند ئةيوب علي

هونەرمەند ئەیوب عەلی:
دەمەوێ گۆڕانكاری لە كارەكانمدا بكەم

بۆ بڵاوكردنەوەی نوێترین بەرهەمی خۆی و سازكردنی چەند كۆنسێرتێكی گۆرانی لە شارەكانی كوردستان و بەشداری كردن لە ئاهەنگەكانی سەری ساڵ هونەرمەندی بە توانای گۆرانیبێژ ئەیوب عەلی بە سەردانێك لە شاری هەولێرە، هەرچەندە باری تەندروستی لەبار نەبوو، بەڵام بە چەند گۆرانییەك بەشداری كرد لە ئاهەنگی رێز لێنانی باشترین لاوی ساڵ كە وەزارەتی وەرزش و لاوان رێكی خستبوو، بۆ ئەوەی خوێنەران لە نزیكەوە ئاگاداری دوایین كار و چالاكییەكانی هونەرمەند و سەردانی ئەم جارەی بین هونەرمەند ئەیوب عەلیمان بەسەركردەوە.
ئەگەر كار وا بڕوات چیتر بەرهەم بڵاو ناكەمەوە
سەرەتا لە بارەی سەردانەكەی هونەرمەند ئەیوب عەلی گوتی: ئەم سەردانەم بە مەبەستی بڵاوكردنەوەی ئەلبوومە تازەكەمە، هەروەها بە نیازی بە ئەنجام گەیاندنی چەند پڕۆگرامێكی هونەریم لەوانە سازكردنی چەند كۆنسێرتێك لە شارەكانی كوردستان، چونكە ئەگەر بگونجێ و بەرنامەیەكی رێكوپێك رێك بخرێت زۆر پێمخۆشە كۆنسێرت بۆ جەماوەرەكەم ساز بكەم و لە نزیكەوە بە دیداریان شاد بم، سەبارەت بە ئەلبوومە تازەكەی و تەواو بوونی هونەرمەند و دەربارەی ئەوەی كە پار ساڵ دوای بڵاوكردنەوەی ئەلبوومی ( ماڵ ئاوایی) بڕیاری ئەوەی دابوو چیتر بەرهەم بڵاو نەكاتەوە كەچی لەم رۆژانە خەریكە بەرهەمێك بڵاو دەكاتەوە هونەرمەند ئەیوب عەلی گوتی: راستە من ئەو قسەیەم كردبوو، ئەمەش لە ئەنجامی ئەوە بوو كە هونەرمەندی كورد تا ئێستا ناتوانێت لەسەر بەرهەمەكانی خۆی بژی و بژێوی ژیانی بە هونەر پەیدا بكات، بەڵام پرۆژەی ئەم ئەلبوومە تازەیەم لەسەر ئەركی كۆمپانیایەكە بە ناوی كۆمپانیای (شانیا) بەرهەم هاتووە و ئەوان خەرجی ئەلبوومەكەیان گرتە ئەستۆی خۆیان، بەڵام بە هاوكارییەكی زۆری هونەرمەند (هەڵكەوت زاهیر) ئەو كارەم بۆ كرا لە لایەن كۆمپانیای ناوبراوەوە، ئەگەر وا نەبوایە رەنگە بە یەك جاری وازم لە بڵاوكردنەوەی بەرهەمی هونەری دەهێنا، چونكە ناكرێ تۆ لەسەر ئەركی خۆت كار بكەیت و دواتریش بازاڕ و تۆمارگەكان خێر و بەرهەمەكەی بخۆن و رەنگە چیدی لە داهاتوودا بە تۆماركردنی ئەلبووم جەماوەر بەسەر بكەمەوە و تەنیا بە تۆماركردنی گۆرانییەك یان كلیپێك بەسەریان بكەمەوە، چونكە خۆشەویستی جەماوەرە وای لێكردووم بمینێمەوە و بەردەوام بم لەكاری هونەری و وا هەست دەكەم ئێستا موڵكی خۆم نیم موڵكی ئەوانم.
ئاهەنگەكانی ئەوروپا زۆر بێ بەرنامەن
هونەرمەند ئەیوب عەلی یەكێكە لەوانەی زۆر كەم لە ئاهەنگە هونەرییەكانی ئەوروپادا دەردەكەوێت و لە زۆبەی كۆنسێرت و ئاهەنگەكاندا بەشداری ناكات، لەم بارەیەوە هونەرمەند دەڵێ: ئەو ئاهەنگ و كۆنسێرتانەی لەوێ رێكدەخرێن زۆر بێ بەرنامەییان پێوە دیارە و بە شێوازێكی زۆر خراپ و نەگونجاو رێكدەخرێن، هۆكارەكەشی ئەوەیە ئەو كەسانەی بە رێكخستنیان هەڵدەستن تەنیا بیر لە لایەنی بازرگانی دەكەنەوە نەك لایەنە هونەرییەكە، بۆیە منیش زۆر بە كەمی بەشدارییان تێدا دەكەم و حەز ناكەم بەو شێوەیە گۆرانی بڵێم، هەر ئاهەنگێك یان كۆنسێرتێك مەرجی خۆمی تێدا نەبێت نایكەم، هەرچەندە دەبێ ئەوەش بڵێم بۆ هونەرمەند پێویستە ئەزموون و تواناكانی خۆی دەربخات و لەسەر شانۆ لەبەردەم جەماوەر گۆرانی بڵێت و بێتە ناو خەڵك، بەڵام ئەگەر بە شێوەیەكی باش نە بێت ئەوا دەرنەكەوتنەكە باشترە لە دەركەوتنەكە.
دەربارەی چوونی بۆ هاندەران و زۆرتر دەركەوتن و ناوبانگ دەركردنی لە هەندەران بە بەراورد لەگەڵ ئەو ساڵانەی لە كوردستان بوو ئەیوب عەلی دەڵێ: چوونم بۆ هاندەر زۆر شت و ئەزموونی نوێی فێر كردم، هەندەران وەك قوتابخانەیەك وابوو، ئەو تەنیاییەی تێیدا دەژیام وەك هاوڕێیەكی بەسوود بوو بۆ من بەتایبەتی لە رووی نووسینی تێكست بۆ گۆرانییەكانم و دانانی ئاواز ئەمەیان بووە زەخیرەیەكی باش بوو بۆ داهاتووی كارە هونەرییەكانم .
تا قەناعەتی تەواوم بۆ دروست نەبێت كاری نوێ ناكەم
دەربارەی ئەو گۆڕانكارییەی لە بەرهەمەی نوێیەكەیدا بەدی دەكرێت بەتایبەتی لە رووی ئاوازەوە كە خۆی داینەناوە و جیاوازە لەگەڵ بەرهەمەكانی تری كە خۆی ئاوازی بۆ داناوە هونەرمەند ئەیوب عەلی دەڵێ: لە ئەلبوومی ئەم جارەمدا گۆڕانكارییەكی زۆرم كردووە و بە ستایلێكی تازەوە كارم لە گۆرانییەكاندا كردووە، سەرجەم ئاوازەكان لە لایەن هونەرمەند هەڵكەوت زاهیر دانراوە، بەڵام بەشێوەیەكی باش گونجاون ئینجا كارمان تێدا كردووە واتە رێككەوتن و لێك تێگەیشتنێكی باشمان هەبووە ئینجا دەستمان بەكار كردووەو تا جەماوەر گوێی لێ نەبێت نازانێت چ كارێكە و بە چ شێوەیەكی جوان و سەركەوتوو كاری بۆ كراوە، بە شێوەیەكی گشتی لەو ئەلبوومەدا كە بەناوی (مۆم) بڵاو دەبێتەوە نەتێكست نە ئاوازی خۆمم بەكارنەهێناوە، چونكە ویستم جیاوازییەك دروست بكەم، من لە هەموو كارەكانی خۆمدا تا قەناعەتی 100%م بۆ دروست نەبێت لە لایەن خودی خۆمەوە كاری لەسەر ناكەم، دیارە كار كردنی ئەو جارەشم لەگەڵ هەڵكەوت زاهیر بە كارێكی زۆر باش و جددی دەزانم، چونكە ئەو دەمێكە كار دەكات و پێم وایە كارێكی باشمان بە یەكەوە كردووە و لەناو خەڵكیش دەنگ و سەدایەكی زۆری دەبێت.
دەربارەی نووسینی تێكستی گۆرانی و جیاوازی لەگەڵ ئەو شیعرانەی كە نووسراون وەك شیعر، ئەیوب عەلی دەڵێ: پێم وایە شیعری گۆرانی تایبەتمەندی خۆی هەیە، شیعری گۆرانی دەبێ وەك چیرۆكێك وابێت سەرەتا وناوەڕۆك و كۆتایی مانای تەواو ببەخشێت، پاشان وشەكانی سادە بێت و بە ئاسانی بێتە سەر زمان و بە ئاسانی لە لایەن گۆێگرەوە وەربگیرێت.
لەمەودوا بۆ رادیۆ و تیڤییەكان بە خۆڕایی چاوپێكەوتن ناكەم
هونەرمەند ئەیوب عەلی لە بەشێكی دیكەی قسەكانیدا سەبارەت بە میدیای كوردی بەتایبەتی رادیۆ و تەلەفزیۆنەكان و دیدارو چاوپێكەوتنی هونەری گوتی: بڕیارمداوە لەمەودوا بەخۆڕایی بۆ دەزگاكانی راگەیاندن قسە نەكەم بەتایبەتی رادیۆ و تیڤیەكان، چونكە چەند ساڵە ئیمە كاری هونەری دەكەین و بەخۆرایی گۆرانییەكان و كلیپەكانمان پێشكەش بەوان كردووە، چونكە ئەو كارە هونەریانەی تا ئێستا ئەنجاممداوە هەموویان لەسەر ئەرك و گیرفانی خۆم بووە ئەیوب عەلی هەروەها دەربارەی شێوازی گۆرانی گوتن بەتایبەتی بە زاراوە كوردییە جیاوازەكان دەڵێ: لە ژیانی هونەریمدا هەمیشە ئارەزووم كردووە لەسەر هەموو شێوەزارە كوردییە جیاوازەكان كار بكەم گۆرانی بڵێم بۆ ئەو مەبەستەش ئارەزوو دەكەم هاوكاری بكرێم بۆ ئەوەی لە ژیانی هونەری خۆمدا خزمەت بە هەموو خەڵكی كوردستان بكەم لە هەر شوێنێك بن.
لە كۆتاییدا هونەرمەند ئەیوب عەلی دەربارەی كاری داهاتووی گوتی: ئێستا خەریكی تۆمار كردنی گۆرانییەكی نوێم تایبەت بۆ شاری هەڵەبجەی شەهید، نیوەی تێكستەكەی خۆم دامناوە، بەڵام حەز دەكەم زۆر بە وردی و بە شێوەیەكی فراوان كاری بۆ بكەم و دوای تۆمار كردنیشی بە نیازم لە شاری هەڵەبجە كلیپێكی شیاوی بۆ تۆمار بكەم، هەروەها ئارەزووی ئەوە دەكەم سروودێكی نیشتیمانی بڵێم، بەڵام دەمەوێ كارێكی تایبەت بێت هیوادارم ئەم دوو كارە بەم نزیكانە تەواو بكەم و دڵی جەماوەری پێخۆش بكەم.

سةرجاوة((www.gulan-media.com)).

supas

سوباس قوربان دةست خؤش .................. سلاو

سلاو بة قوربان سوباس بؤ تؤش