قصيدة على لسان شابة عراقية فقدت امها

قصيدة عن لسان شابه عراقيه فقدت امها في ديار الغربه
وهيه بعيده عن ابيها واخوتها
حيث هيه وامها المرحومه تسكن في سوريا
وكان ابيها واخوتها في دوله اخرى والقصيدة للشاعر المبدع علي الديواني
عسى ان تنال رضاكم

تحياتي : حكمت البياتي

ييمه شلون وحدي بغربه عفتيني
لا يمـــي الأَبـو ولا يمي خوانـي

وماشفت اني اخوتي ويه اليشيعون
هذا الـزاد همي وكثر احزانـــــــي

ملك الموت حيل استعجل وجاچ
وحيـــده بلا حنانچ يمه خلانـــي

شلون انطاچ كلبچ عني تمشيــــن
ولو اني ادري هذا الامر ربانــي

تمنيت اني ادفنچ وسط العيــــون
وصيرلچ چفن وتظمچ احظانــي

دفانـــچ نخيتــــه توسلت بيـــه
گلتله اتركها لمي وصير دفاني

ضلمه الدنيه صارت ياضوه العين
وبليـــاچ الفرح لليــــوم ماجانــــي

بچبت بدم عليچ ومابچيت دموع
ويمكن هم عيوني بچيتهن انــــي

حتى البيت يبچي ويسأل عليــچ
ويگلي فراگ امچ والله بچانـــي

عليله واحس روحي معذبه هواي
واموت واحتي والمرض اذانــي

گبل لو مر عليه المرض لحظات
مايغمض چفنها وتبچي وتعانـــي

وهسه اصبحت كلي الام وجروح
غيرچ ماكو واحد يمه داوانـــــــي

كلمات حزينة جدا......... بس روعه في الاخيتار
الشاعر علي الديواني من مبدعي كتاب القصائد المغناة

لا تبچــي وتخلينـــي ابچــي ويـــاك
ماتســـوه الدمــع صدگني دنياتــــــك

افرح وابتسم وانسه الحزن يهــواي
مـاريــد الدمع يمحيلي ضحكاتـــــك

تقبل مروري مع كل الود

شكرا لمرورك اللطيف, تقبلي تحياتي